-Mile! Jel spiš?

-Više ne. Ča je?

-Trebam te pitat nešto.

-Ajd pitaj onda.

Stari privuče stolicu, sede i zagljeda se u kompjuter u mojoj sobi.

-Kako dela kompjuter? Jel dobro, ne šteka i to?

-A dobro je.. mogal je bit i jači da si til ku marku više prominit. – rečem.

-Dobro, dobro. Dosta ti je i vo. A i ča ti treba jači za Brinje?

-Ma to nema veze sa Brinjem. Al dobro. Jesi to til pitat?

Stari se malo uskomešal na stolcu.

-Ma da... a kako internet, jel to dobro radi?

-A i to bi moglo bit brže da si til kupit brži modem. Al je trebalo još ku marku prominit. Ovako- ...

-Ajde ne zajebavaj! – dreknu stari. – Lipo te pitam.

-Radi radi. Al je spor  ko Marke kad mu dadu ča za delat.

-Aha. Al bitno da radi. To je bitno. Nego... ja nis baš naučen na te kompjutere, u moje vrime toga ni trebalo. Mi kad smo tili razgovarat s čovikom onda smo otišli do njega u kuću ili smo okrenuli telefon.

-Dobro stari, ča ti oš pitat? – rečem.

-Ča ča ja oću pitat! Pa lipo te pitam i razgovaram. A ti se benaviš tote!

-Ne benavim ja nego ti još nisi niš pametnog pital!

-Kad te ja blisnem zaduvo! Onda ćeš vidit ča je pametno pitanje! Til sam te pitat o tom internetu da mi malo pojasniš kako radije i to. Eto na, to sam te til pitat!

Onda su se otvorila vrata od sobe i na njima se pojavil Marke.

-E baš sam te i ja mislil isto to pitat, da mi malo posudiš taj internet!

-A samo si mi još i ti falil.. ča ste danas navalili na vu vrućinu.. –rečem i dignem se sa kreveta.

-Nema veze, objasnit ćeš mi drugi put, kad te projdedu te muve. – stari se dignu i ode kroz vrata.

-Super, imat ćeš više vremena za me. –reče Marke i privuče stolicu do kompjutera.

-Mile, daj upali vo.

Dok se kompjuter palil Marke se nagnu. – Znaš ča ja oću?

-Ča?

-Pornografiju.

-Ajde ne seri. Zato si me došal zajebavat?

-Ajde nemoj ti srat. Vi svaki dan pričate o tome u birtiji, oću i ja vidit kadi se seksadu.

-Marke, jesi ti dosadan. Evo ti kompjuter pa sam traži i gljedaj.

-Pa kako ću ja to? Kad ne znam. – Marke se snuždil kej kucić.

-E lako ti je. Evo gle. Vo ti je tražilica, to ćeš preko nje delat.

-Ča ću delat? Pa neću se ja seksat. Ja oću gljedat kako se drugi seksadu.

-Pa to ti i govorim, konju. Tote upiši ča te zanima i gledaj.

-Vodeka?

-Tote. I onda klikneš naj tamo enter. A ja ode na ladnu pivu, neda mi se gledat ča tebe  zanima. Već sam sve vidil.

-Dobro, dobro, samo i odi, dalje ću ja sam. Sad je lako. – reče Marke, dok je zagrizal jezik i jednim prstom tražil slova da utipka ča ga zanima.

U kujinji sam iz frižidera izvadil pivu, otišal pred kuću i u ladu sel da je lagano pocuclam. Mislim da ni prošlo ni pol sata, kad je iz kuće izletil Marke.

-Jebal te naj tvoj internet!

-Ča je sad?

-Nema niš na njemu. Nis niš našal!

-Ma daj, kako nisi?

-Tako. Niš nema! To samo kad ja oću pogljedat, jebal majku svoju taj internet!

-Pa ča si napravil? Da ni veza pukla?

-Nis niš napravil! Samo sve ča si rekal.

-Upisal si u tražilicu ča te zanima?

-Jes!

-I nema niš? Niš ni otvorilo?

-Nema! Ni!

-Pa ča si upisal?

-Pa to ča  me zanima.

-Pa dobro, al ča točno?

-E pa i ti ga benaviš! Pa znaš ča sam upisal! Ča bi me moglo zanimat? Di ima pive? U frižideru? -Okrene se Marke i ode prema kući.

-U frižideru, donesi i meni još jednu! I ča si onda upisal? –deral sam se za njim dok je već ulazil u kuću.

A ljuti Marke mi je odgovoril i ne okrećuć glavu, sa ulazni vrat:

-Pička! Eto ča sam upisal.

(kraj prvoga diela)